१४ असार, नेपालगन्ज । विगत केही दिनदेखि नेपालगन्जका विभिन्न क्षेत्रमा विशेषकर रातिको समयमा पटक–पटक विद्युत आपूर्ति अवरुद्ध हुँदा सर्वसाधारणले निकै सास्ती खेपिरहेका छन् ।
अत्यधिक गर्मीको समयमा लामो समयसम्म विद्युत कटौती हुँदा बालबालिका, ज्येष्ठ नागरिक, बिरामी तथा विद्यार्थी सबैभन्दा बढी प्रभावित भएका छन् ।
स्थानीयवासीका अनुसार रातिको समयमा बारम्बार विद्युत जाने र कहिलेकाहीँ लामो समयसम्म नआउँदा दैनिक जीवन अस्तव्यस्त बनेको छ । विद्युत अवरोधका कारण खानेपानी वितरण, इन्टरनेट सेवा, साना उद्योग–व्यवसाय तथा अन्य अत्यावश्यक सेवासमेत प्रभावित हुने गरेका छन् । यदि मर्मत, प्राविधिक समस्या वा लोड व्यवस्थापनका कारण विद्युत अवरुद्ध गर्नुपर्ने अवस्था भएमा त्यसबारे पूर्वसूचना नदिइँदा सेवाग्राहीले थप असुविधा भोग्नुपरेको गुनासो गरेका छन् ।
विद्युत सेवा आधुनिक जीवनको आधारभूत आवश्यकता भएकाले यसको नियमित, भरपर्दो र गुणस्तरीय आपूर्ति सुनिश्चित गर्नु सम्बन्धित निकायको दायित्व हो । नागरिकले पनि समस्या समाधानका लागि प्राधिकरणसँग सहकार्य गर्न तयार रहेको जनाउँदै, सेवामा देखिएका कमजोरीलाई समयमै सुधार गरी सर्वसाधारणको विश्वास कायम राख्न आग्रह गरेका छन् ।
नेपालगन्जजस्तो तीव्र रूपमा विस्तार भइरहेको सहरमा गुणस्तरीय विद्युत सेवा केवल सुविधा मात्र नभई आर्थिक गतिविधि, शिक्षा, स्वास्थ्य र जनजीवनसँग प्रत्यक्ष जोडिएको विषय हो । त्यसैले सम्बन्धित निकायले समस्याको स्थायी समाधानतर्फ शीघ्र पहल गर्ने अपेक्षा स्थानीयवासीले गरेका छन् ।
स्थानीय नागरिकहरूले सम्बन्धित विद्युत प्राधिकरणसँग निम्न विषयमा विशेष ध्यान दिन आग्रह गरेका छन्ः
रातिको समयमा हुने विद्युत अवरोधको वास्तविक कारण सार्वजनिक गर्ने, मर्मत वा प्राविधिक कार्यका लागि विद्युत बन्द गर्नुपर्ने भए अग्रिम सूचना जारी गर्ने, समस्या देखिने फिडर तथा वितरण प्रणालीको तत्काल प्राविधिक परीक्षण गरी दीर्घकालीन समाधान गर्ने, आकस्मिक विद्युत अवरोध भएमा त्यसको जानकारी सामाजिक सञ्जाल, एसएमएस वा स्थानीय सञ्चारमाध्यममार्फत समयमै उपलब्ध गराउने, सेवाग्राहीका गुनासा छिटो सुनुवाइ हुने प्रभावकारी हेल्पडेस्क सञ्चालन गर्ने ।
