३० कार्तिक, नेपालगन्ज । सूर्यदेवको उपासना र आराधनासहित चार दिनसम्म श्रद्धा, भक्ति र निष्ठापूर्वक मनाइने लोकआस्थाको महापर्व छठ आज सोमबार बिहान उदाउँदो सूर्यलाई अर्घ्य अर्पण गरेसँगै विधिवत् रूपमा सम्पन्न भएको छ ।
नेपालगन्जस्थित प्रसिद्ध बागेश्वरी मन्दिर परिसरमा रहेको तलाउमा भेला भएका व्रतालुहरूले बिहानै उदाउँदो सूर्यको पूजा आराधना गर्दै दूध, जल, फूल तथा विभिन्न पूजासामग्रीसहित अर्घ्य अर्पण गरेका थिए । अर्घ्य अर्पणसँगै छठी माताको पूजा गरी व्रतालुहरूले आफ्नो कठोर व्रत समापन गरेका हुन् ।
छठ पर्वको अवसरमा बागेश्वरी मन्दिर परिसरस्थित तलाउलाई आकर्षक रूपमा सजाएर छठघाट निर्माण गरिएको थियो । तलाउ परिसरमा विद्युत् बत्ती, टेन्ट तथा अन्य सजावटका साथै भजनकीर्तनको व्यवस्था गरिएको थियो । आइतबार साँझ अस्ताउँदो सूर्यलाई अर्घ्य दिन ठूलो संख्यामा श्रद्धालुहरू छठघाट पुगेका थिए भने सोमबार बिहान पनि उदाउँदो सूर्यको पूजाका लागि व्रतालु तथा दर्शनार्थीहरूको उपस्थिति रहेको थियो ।
चार दिनसम्म विभिन्न धार्मिक विधि र परम्पराअनुसार मनाइने छठ पर्वको पहिलो दिन नहाय–खाय, दोस्रो दिन खरना, तेस्रो दिन अस्ताउँदो सूर्यलाई सन्ध्या अर्घ्य र चौथो दिन उदाउँदो सूर्यलाई बिहानको अर्घ्य दिने परम्परा रहेको छ ।
छठ पर्वमा विशेषगरी व्रतालु महिलाहरूले परिवारको सुख, शान्ति, समृद्धि, सुस्वास्थ्य तथा सन्तानको दीर्घायुको कामना गर्दै कठोर व्रत बस्ने धार्मिक विश्वास छ । यस पर्वमा बाँसको सुपुली र नाङ्लोमा नरिवल, उखु, केरा, अदुवा, बेसार, ठेकुवा, भुसुवा लगायतका सामग्री राखेर सूर्यदेवलाई अर्पण गर्ने चलन छ ।






