९ जेठ, नेपालगञ्ज । बाँके युनेस्को क्लबले मर्यादित र सुरक्षित वातावरणमा व्यवसाय एवं रोजगार सञ्चालनकालागि बर्दियाको ठाकुरबाबा नगरपालिकामा रहेका रोजगारदाता र श्रमिकहरुका लागि अभिमूखिकरण कार्यक्रम गरेको छ । प्लान इन्टरनेशनल नेपालको सहयोगमा बाँके युनेस्को क्लबद्धारा सञ्चालन गरिएको पर्ल परियोजना अन्तर्गत सो अभिमूखिकरण गरिएको हो । सो अभिमूखिकरणमा नगरपालिका भित्रका युवा महिलालाई रोजगारी र व्यवसायमा लगाउन देखिएका समस्या र चुनौतीहरुसंगै अवसर तथा अन्य विभिन्न प्रकारका अवरोधका बारेमा छलफल गरिएको पर्ल परियोजनाका संयोजक गोविन्द लामिछानेले बताउनुभयो । कार्यक्रममा ठाकुरबाबा नगरपालिकाको रोजगार संयोजक रविन्द्र अर्यालले रोजगारदाता र श्रमिक दुबैलाई एकै ठाउँमा राखेर गरिएको यो कार्यक्रम निकै सकारात्मक रहेको र यसबाट युवा महिलालाई रोजगारीमा जान सहज हुने बताउनुभयो । उद्योग वाणिज्य संघका अध्यक्ष गोविन्द आचार्यले महिलालाई आर्थिक रुपमा सबल बनाउन उनिहरुलाई पनि समान अवसर दिनुपर्ने र काममा कुनै पनि प्रकारको विभेद वा अडचन आउन नहुने वातावरण बनाउनुपर्नेमा जोड दिनुभयो । होटल अर्गनाइजेशनका अध्यक्ष चन्द्रकान्त काफ्लेले युवा महिलाको रोजगारीका लागि होटल व्यवसायी सकारात्मक रहेको बताउनुभयो । बर्दिया टाईगर रिसोर्टका सञ्चालक दिवश अधिकारीले युवा महिलालाई रोजगारीमा लगाउन शिक्षा र सिपमा विशेष जोड दिनुपर्ने बताउनुभयो । कार्यक्रमको सहजिकरण अधिवक्ता राजकुमार थारुले गर्नु भएको थियो भने कार्यक्रममा इको टुरिज्मका डिल्ली प्रसाद भट्टराई, होटल व्यवसायीहरु, विद्यालयका शिक्षक शिक्षिका, विभिन्न व्यवसाय र रोजगारमा कार्यरत श्रमिक गरेर ३३ जनाको सहभागिता रहेको थियो । सो अभिमूखिकरणमा सहभागि अधिकांशले युवा महिला रोजगारीमा नआउनुमा सुरक्षित वातावरण नहुनु, अशिक्षा, लैंगिक विभेद, कामको महत्व नबुझ्नु, कानुनी प्रावधानको कमी र परिवारिक असहयोगनै मुख्य कारण रहेको निष्शर्क निकालेका थिए ।
