५ कात्तिक, नेपालगन्ज । हिन्दू धर्मावलम्बीहरूको महान् पर्व बडादशैं तथा नवरात्रिका अवसरमा नेपालगन्जका विभिन्न स्थानमा स्थापना गरी पूजाआजा गरिएका दुर्गा भवानीका प्रतिमाहरू धार्मिक विधिपूर्वक बिहीवार विसर्जन गरिएको छ ।
नवरात्रिभरि दुर्गा भवानीको पूजा, आराधना तथा भजनकीर्तन गरी दशैँको उल्लासमा सहभागी भएका भक्तजनहरूले पर्व सम्पन्न भएसँगै दुर्गा प्रतिमाहरू विसर्जन गरेका हुन् । विभिन्न टोल तथा स्थानमा स्थापना गरिएका दुर्गा प्रतिमाहरूको विसर्जनका क्रममा श्रद्धालु भक्तजनहरूको सहभागिता रहेको थियो ।
दुर्गा भवानीको प्रतिमा स्थापना गरी नौ दिनसम्म पूजा आराधना गर्ने परम्पराअनुसार भक्तजनहरूले परिवार तथा समाजको सुख, शान्ति, समृद्धि र कल्याणको कामना गर्दै पूजापाठ गरेका थिए । विजयादशमीको धार्मिक तथा सांस्कृतिक महत्त्वसँग जोडिएको दुर्गा पूजाले समाजमा धार्मिक आस्था, आपसी सद्भाव र सामूहिक एकताको भावना अभिवृद्धि गर्न सहयोग पु¥याउँदै आएको छ ।
नेपालगन्ज बहुधार्मिक तथा बहुसांस्कृतिक पहिचान बोकेको सहर भएकाले यहाँ विभिन्न पर्वहरू आपसी सम्मान र सद्भावका साथ मनाउने परम्परा रहिआएको छ । दुर्गा प्रतिमा स्थापना, पूजा आराधना र विसर्जनजस्ता धार्मिक गतिविधिले स्थानीय समुदायमा सांस्कृतिक परम्पराको संरक्षण तथा निरन्तरतामा समेत योगदान पु¥याउँदै आएका छन् ।
दुर्गा भवानीको पूजा आराधनासँगै सम्पन्न भएको दशैँ पर्वले सत्यको विजय, असत्यमाथि सत्यको जित तथा अन्यायमाथि न्यायको विजयको सन्देश दिने धार्मिक विश्वास रहिआएको छ । प्रतिमा विसर्जनसँगै नवरात्रिका औपचारिक धार्मिक गतिविधि सम्पन्न भएका छन् ।
नेपालगन्जमा घटस्थापनादेखि विभिन्न चोक तथा टोलमा दुर्गा प्रतिमा स्थापना गरी पूजाआजा गरिएको र विसर्जनका लागि राप्ती नदीतर्फ लैजाने परम्परा रहँदै आएको छ ।
