लागुऔषध सहित प्रहरी जवान पक्राउ

५ फागुन, नेपालगञ्ज । नेपालगञ्जको जमुनाह नाकाबाट प्रतिबन्धित लागुऔषध सहित एक जनालाई प्रहरीले पक्राउ गरेको छ ।
पक्राउ पर्नेमा जिल्ला जाजरकोट खलंगा–४ बस्ने वर्ष २४ को तिलक सुनार रहेका छन् ।
भारतको रुपैडिहा बजारबाट नेपालगञ्जतर्फ पैदल हिँडेर आउँदै गरेको अवस्थामा सुनारको व्यवहार शंकास्पद लागेपछि लागुऔषध नियन्त्रण ब्यूरोको टोली र जमुनाह प्रहरीको टोलीले आवश्यक चेकजाँच गर्ने क्रममा उनको साथबाट लागुऔषध ६ सय क्याप्सुल ट्रामाडोल फेला परेको जमुनाह प्रहरीले जनाएको छ ।
पक्राउ परेका सुनार काठमाडौ उपत्यका प्रहरी सुरक्षा गण त्रिपुरेश्वरमा प्रहरी जवान पदमा कार्यरत रहेको खुल्न आएको छ ।
पक्राउ परेका सुनारलाई थप अनुसन्धानका लागि जिल्ला प्रहरी कार्यालय बाँकेमा लगिएको प्रहरीले जनाएको छ ।