२६ चैत्र, नेपालगञ्ज । नेपाली कांग्रेस बाँकेले सुशिल कोइराला प्रखर क्यान्सर अस्पताल खजुराका विरामीहरुलाई फलफूल वितरण गरेको छ ।
जनआन्दोलन दिवस २०७९ को अवसरमा कांग्रेस बाँकेले अस्पताल पुगेर २०० जना विरामीहरुलाई फलफूल वितरण गरेको पार्टी सचिव सुधांशु कोइरालाले जानकारी दिए ।
नेपाली कांग्रेस बाँकेका कार्यवाहक सभापति गोपालप्रसाद अधिकारीको सभापतित्व एवम् केन्द्रिय सदस्य मैकुलाल बाल्मिकीको प्रमुख आतिथ्यतामा सम्पन्न फलफूल वितरण कार्यक्रममा निवर्तमान पार्टी सभापति किरण कोइराला, पूर्व पार्टी सभापति कृष्णमान श्रेष्ठ, नेता कार्यकर्ता, अस्पताल विकास समितिका अध्यक्ष टेकेन्द्र मल्ल, कार्यकारी निर्देशक डा.निरज भट्टराई लगायत उपस्थित थिए ।
त्यसक्रममा बोल्दै केन्द्रिय सदस्य बाल्मिकीले प्रजातन्त्र पुनःस्थापनाका लागि २०४६ मा कांग्रेसले गरेको अगुवाईका कारण व्यवस्था परिवर्तनको आधार बनेको बताउँदै जनआन्दोलनका सहिद, घाइते र सहभागीहरुलाई स्मरण गर्दै कांग्रेसले अब जनताको अवस्था परिवर्तनका लागि काम गर्ने बताए । उनले कांग्रेस बाँकेले जनआन्दोलन दिवसलाई सम्झँदै पार्टीका मूर्धन्य नेता स्वर्गीय सुशिल कोइरालाको नाममा स्थापित अस्पतालका विरामीलाई फलफूल वितरण गरेर पूण्य काम गरेको बताए । निवर्तमान सभापति कोइरालाले अस्पतालमा डाक्टर कर्मचारीको दरबन्दी र सेवासुविधाको अवस्था, स्रोत साधनको उपलब्धता, भोगिरहेका अप्ठेरा, विरामीहरुले पाइरहेको सेवा सुविधाका बारेमा जिज्ञासा राख्दा अस्पतालका कार्यकारी निर्देशक डा.भट्टराईले अस्पतालका बारेमा जानकारी गराउँदै विद्यमान समस्याहरुबारे पनि अबगत गराएका थिए ।
जिल्ला उपसभापति कृष्णबहादुर कार्कीले स्वागत मन्तब्य व्यक्त गरेको कार्यक्रमको सञ्चालन सचिव कोइरालाले गरेका थिए । नेपाली कांग्रेस बाँकेले जनआन्दोलन दिवसका अवसरमा तीन वटै प्रतिनिधिसभा क्षेत्रीय कार्यसमितिमार्फत सम्पूर्ण प्रदेशसभा क्षेत्रीय कार्यसमिति, पालिका र वडाहरुमा सामाजिक र सिर्जनात्मक कार्यहरु गरेर जनआन्दोलन दिवस मनाउन गरेको आह्वान बमोजिम सबैतिर कार्यक्रमहरु गरिएको सचिव कोइरालाले बताए ।
बोन टिबीपीडित थारुलाई कांग्रेस क्षेत्र नम्बर १ बाँकेद्वारा सहयोग
नेपाली कांग्रेस क्षेत्र नम्बर १ बाँकेले विरामीलाई सहयोग गरेको छ । जनआन्दोलन दिवस २०७९ का अवसरमा क्षेत्र नम्बर १ ले बोन टिबी रोगपीडित राप्तीसोनारी गाउँपालिका वडा नम्बर ३ का निर्वतमान वडा अध्यक्ष एवम् नेपाली कांग्रेस प्रदेशसभा क्षेत्र नम्बर १(१) का सचिव गंगाराम थारुलाई सहयोग हस्तान्तरण गरेको क्षेत्रीय प्रबक्ता तुलाराम खत्रीले जानकारी दिए । थारुको राप्तीसोनारी ३ बैजापुरस्थित निवासमै पुगेर नगद ६० हजार २ सय १० रुपैयाँ र फलफूल वितरण गरिएको हो ।
वडा नम्बर ३ का वडा सभापति शंकर महतराको सभापतित्व एवम् क्षेत्रीय सभापति पोषण केसीको प्रमुख आतिथ्यतामा भएको सहयोग हस्तान्तरण कार्यक्रममा राप्तीसोनारी गाउँपालिकाका पूर्व अध्यक्ष एवम् महाधिवेशन प्रतिनिधि लाहुराम थारु, जिल्ला सदस्य बुद्धिराम थारु, गाउँपालिका उपाध्यक्ष मनिषासिंह थारु, पालिका सभापति भिमबहादुर राना क्षेत्री लगायत उपस्थित थिए ।
त्यसक्रममा बोल्दै क्षेत्रीय सभापति केसीले बोन टिबी रोगसंग जुधिरहेका चौधरीलाई उपचारमा सहजताका लागि सकेजति सहयोग रकम प्रदान गरेको बताए । उनले पार्टीका नेता कार्यकर्ताहरुको सुखदुःखमा क्षेत्रीय कार्यसमिति सधैं संगसंगै रहने बताउँदै चौधरीको शीघ्र स्वास्थ्य लाभको कामना गरे । कार्यक्रमको सञ्चालन क्षेत्रीय सचिव खुमबहादुर बस्नेतले गरेका थिए । क्षेत्रीय कार्यसमिति, पार्टी पंक्ति र विभिन्न व्यक्तिहरुको सहयोगमा रकम संकलन गरिएको प्रबक्ता खत्रीले बताए ।
