आज चहल्लम पर्व मनाइँदै

११ भाद्र, नेपालगञ्ज । कर्बलाका शहीदहरुको सम्झनामा मनाइने इस्लाम धर्मावलम्बीहरुको महान पर्व मोहर्रमको ठिक ४० दिनपछि मनाइने चहल्लम पर्व आज मनाइँदैछ ।
इस्लाम धर्मका प्रवर्तक हजरत मोहम्मदका नाती हजरत इमाम हुसैन सहित उहाँका परिवार सदस्य आफन्त र उहाँका साथी लगायतकाहरुले शताब्दीयांै अघि ईराकको कर्बलामा शहादत प्राप्त गरेको स्मरणमा मोहर्रम पर्व मनाइने गरिन्छ ।
मोहर्रम पर्वको ठिक ४० दिनपछि चहल्लम पर्व मनाउने परम्परा रहेको छ ।
यस अवसरमा आज राती नगरको विभिन्न स्थानमा ताजिया स्थापित गरिएका छन् । साथै हुसैनी जुलुस पनि आज राती निकालिने भएको छ ।
नगरभरि स्थापित गरिएका ताजियाहरु विभिन्न धार्मिक अनुष्ठानपछि बाजागाजा तथा विभिन्न झाँकीसहितको जुलुसका साथ भोलि बुधवार फुल्टेक्राको कर्बला मैदानमा लगेर विसर्जन गरेपछि चहल्लम पर्व सम्पन्न हुने भएको छ ।